ఇస్కాన్ ఆలయంలో భక్తుల కిటకిట

*ఇస్కాన్ ఆలయ చరిత్ర, విశిష్టత*

శ్రీకృష్ణాష్టమి వేడుకలు 

శ్రీకృష్ణుని తత్వాన్ని ప్రపంచవ్యాప్తంగా తెలియజేయాలనే సంకల్పంతో 1966 జూలై 13న భక్తివేదాంత స్వామి ప్రభుపాద అనే ఆధ్యాత్మికవేత్త అమెరికాలోని న్యూయార్క్ నగరంలో 70 ఏళ్ల వయసులో కేవలం రూ.40లతో ఇస్కాన్ సంస్థను స్థాపించారు. ISKCON అంటే *International Society for Krishna Consciousness*. భగవద్గీత, భాగవతంలోని కృష్ణ తత్వాన్ని ప్రపంచానికి పరిచయం చేసి, ప్రజల్లో ఆధ్యాత్మికతను పెంపొందించడమే ఈ సంస్థ లక్ష్యం.

500 ఏళ్ల క్రితం చైతన్య మహాప్రభు అందించిన *"హరే కృష్ణ హరే కృష్ణ, కృష్ణ కృష్ణ హరే హరే, హరే రామ హరే రామ, రామ రామ హరే హరే"* అనే మహామంత్రాన్ని ప్రభుపాద ప్రపంచానికి తీసుకెళ్లారు. ఈ ఆలయాల్లో రాధాకృష్ణులు, గౌర-నితాయి, జగన్నాథ-బలదేవ్-సుభద్ర విగ్రహాలు కొలువై ఉంటాయి. ఇక్కడ కేవలం దర్శనానికే కాకుండా నామ సంకీర్తన, భగవద్గీత తరగతులు, ప్రసాదానికి అధిక ప్రాధాన్యత ఇస్తారు. అక్షయపాత్ర సంస్థ ద్వారా కోట్లాది మంది పిల్లలకు ఉచిత భోజనం అందిస్తున్నారు.

*శ్రీకృష్ణ జన్మాష్టమి వేడుకలు ఘనంగా...*

తిరుపతిలోని ఇస్కాన్ ఆలయంలో సెప్టెంబర్ 4వ తేదీన శ్రీకృష్ణ జన్మాష్టమి వేడుకలను అత్యంత వైభవంగా నిర్వహించారు. ఉదయం నుంచే ప్రపంచం నలుమూలల నుండి లక్షలాది మంది భక్తులు ఆలయాన్ని సందర్శించి హరే కృష్ణ నామాన్ని జపిస్తూ స్వామివారిని దర్శించుకున్నారు.

భక్తులకు ఎలాంటి అసౌకర్యాలు కలగకుండా, ఎలాంటి అవాంఛనీయ సంఘటనలు జరగకుండా పోలీసులు గట్టి బందోబస్తు ఏర్పాటు చేశారు. భక్తులకు అవగాహన కార్యక్రమాలు కూడా నిర్వహించారు.

ఉదయం నుండి రాత్రి వరకు భక్తజన సందోహంతో తిరుపతి కళకళలాడింది. విద్యుత్ దీపాల కాంతులతో దశావతారాలు, గరుడ పురాణం, శ్రీకృష్ణ లీలలు, మహావిష్ణు అవతారాలు వంటి కళాత్మక రూపాలను ఏర్పాటు చేసి భక్తులకు కనువిందు చేశారు.

క్రీడా మైదానంలో ఏర్పాటు చేసిన సాంస్కృతిక కార్యక్రమాల్లో శ్రీకృష్ణునికి సంబంధించిన కూచిపూడి నృత్య ప్రదర్శన ఎంతగానో ఆకట్టుకుంది. చిన్న పిల్లల నుండి పెద్దల వరకు శ్రీకృష్ణుడు, రాధ, గోపిక వేషధారణలో మాడవీధుల్లో తిరుగుతూ అందరినీ ఆకట్టుకున్నారు.

ఆలయాన్ని సందర్శించిన భక్తులందరికీ ఆలయ నిర్వాహకులు ప్రసాద వితరణ, త్రాగునీటి సౌకర్యం, కనీస వసతులు కల్పించారు. తిరునాళ్లను తలపించే విధంగా తిరుపతిలో శ్రీకృష్ణ జన్మాష్టమి వేడుకలు ఘనంగా ముగిశాయి.